Menya uko wasubiza muri INTERVIEW : Ubajijwe impamvu ariwowe ukwiriye guhabwa akazi

Abakoresha benshi bakunze kubaza iki kibazo ngo : "Kuki ari wowe tugomba guha akazi kuruta abandi bose bagashaka kandi nabo babifitiye ubumenyi", ushobora kubibazwa mundimi zitandukanye bitewe n’ ubushake bw’ umukoresha . Burya ikibazo cyose uzabazwa muri Interview baba bagamije kugukuramo amakuru kugirango baze kubona uko bafata umwanzuro. Hari n’ abakoresha bazagerageza kugusobanurira icyo bashatse kukubaza cg bakakubaza gutya :

  • Kuki tugomba kuguha akazi ?
  • Kuki ari wowe ukwiriye aka kazi ?
  • Ni akahe gashya uzazana muri aka kazi ?

Burya uba ugomba kwitegura gusubiza bene ibyo bibazo mbere yo kugera muri interview mbega ukaba ufite impamvu zifatika ziza kubemeza ko bagomba kuguha akazi. Nubwo umukoresha atakubaza kimwe muri ibyo bibazo ariko ugomba guhora witeguye kugisubiza igihe icyaricyo cyose mugihe uri gukora interview.

Wakwibaza impamvu abakoresha bakunze kubaza iki kibazo ?

Akazi k’ umukoresha n’ ugushaka umukozi ushoboye akazi. Ikindi abantu bose babasha kugera kucyiciro cya Interview burya baba bashoboye. Bityo umuntu ugomba gutsinda aba agomba kuba wawundi ubishoboye koko kuburyo agira icyo arusha abandi. Ibyo bibaho iyo uwo mwanya uhatanirwa muburyo bw’ ipiganwa rusange riciye m’ umucyo.

Umuntu uri gukoresha interview nawe burya aba ari kwirengera kuko iyo hafashwe umuntu udashoboye bivugwa ko byatewe na awundi wamuhesheje akazi. Nanone iyo akazi gahawe umuntu ushoboye, amanota ahabwa wa muntu wemeje ko uwo mukozi ahabwa akazi.

Niyo mpamvu uzakubaza akubaza agirango umwigaragarize koko ko ushoboye ako kazi cg umwanya uri gusaba. Bityo natwe tugiye kukubwira ingero z’ ingingo washingiraho umwemeza ko ari wowe ushoboye. Wamubwira ko :

  • Ushobora gukora neza akazi ushinzwe kandi ukesa imihigo kuburyo bw’ indashikirwa
  • Uzaba uri umukozi w’ ingirakamaro wiyongereye muri team.
  • Ufite uruhurirane rw’ ubumenyi n’ ubunararibonye bituma ubasha kuba indashyikirwa muruhando rw’ abandi bantu

Nanone iyo ubajijwe bene icyo kibazo uba uhawe amahirwe yo kwigaragaza nkuko twabivuze haruguru. Igisubizo cyawe kigomba kuba ari nk’ incamake ya za ngingo nk’ eshatu cg enye wumva ko koko zagufasha mu guhamya ko ari wowe ukwiriye ako kazi. Nibyiza kandi ningombwa ko uba ufite izo ngingo aho kuvuga ibintu byinshi cyane bitandukanye kandi ntakintu uri kubishingiraho.

Ikindi cyangombwa nuko ibyo uba uri bushingireho ugomba kubijyanisha n’ ibyo umukoresha acyeneye cg byagaragajwe ko ugomba guhabwa akazi agomba kuba yujuje. Bimwe mubyo ushobora kujya wibandaho n’ ibi bikurikira :

  • Uburambe ufite mukazi
  • Uburambe ufite mu gukora ibintu bitandukanye by’ umwihariko
  • Ubumenyi ufite
  • Imihigo y’ indashyikirwa wesheje
  • Ibihembo n’ amashimwe wahawe
  • Ubumenyi wize cyangwa amahugurwa wakoze

Kuvuga ku mihigo y’ indashyikirwa wesheje cg ibintu wakoze bidasanzwe bijya byongera amahirwe cyane mugihe wabijyanishije n’ ibicyenewe kuri uwo mwanya cyane ko burya umukoresha aba acyeneye umuntu uzazana udushya kandi akesa imihigo n’ inshingano ze neza.

Ubundi buryo bwa ngomba mu gusubiza nuko ugomba no kwerekana uruhurirane rw’ ubumenyi ufite ndetse n’ ubunararibonye ufite. Dufatiye urugero nko bantu bize ibijyanye na mudasobwa, uzasanga abenshi basubiza ko bafite ubumenyi bwinshi muri Programming, ariko baramutse babihuje nuko bafite n’ ubunararibonye mu kuyobora(leadership) wenda byashyiramo ikinyuranyo kubo bahatanira akazi.

Wibuke ko ugomba kuba wifitiye icyizere ubwawe mugihe uri kuvuga cg gusubiza muri interview. Ugomba gukora kuburyo abo uri gusubiza bizera ukuri kw’ ibyo uri kubabwira. Yego uburambe n’ ibindi ni ngombwa ariko burya utigaragaje neza muri interview bishobora kudahabwa agaciro.

Wakora icyi mugihe utabajijwe bene iki kibazo ?

Iki ubundi ni ikibazo cyiza gikunze kubazwa muri interview nyinshi ariko abakoresha baratandukanye ushobora kubona batakubajije impamvu ubona ari wowe mukozi mwiza ukwiriye guhabwa ako kazi kuruta abandi !!

Iyo bigenze gutyo ucunga igihe uje kubazwa ikibazo gisa n’ icyerekeranye n’ icyo ugahita wifashisha kwa kwitegura wagize kuri za ngingo. Nanone wibuke ko umukoresha mwiza hari nigihe aguha umwanya interview igiye gusoza ngo nawe ube wagira icyo wavuga niba ubishaka. Iyo rero uba uhawe amahirwe uba ugomba kuyakoresha neza, bityo ugahita ukora kuri zangingo twavuzeho bikakongerera amahirwe. Mukomeze mwiyungure ubumenyi n’ ubuhanga kandi mbifurije gukomeza gutsinda !!!

Byanditswe na : Jean HABIMANA / UBUHANGA.COM / habijean2020@yahoo.fr

Share Button